Vinski put

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

Nikoliko godišć posli Drugega svitskoga rata olitiga gvere Vinkota Damijonića vinski put odve je iz  Molega mista na škoju u  Veliko slovensko misto di ga je vinarska zadruga sa škoja poslala da otvori  Prodajalnu dalmatinskih vin. Ta butiga imala je podrum di je u karatilima bilo  čorno vino od molega plavca i bilo vino od bogdanjuše i parča, a u damijonima Vinko je doržo prošek i rakiju.

Izvonka je bilo lako intrat u molu butigu  s velikin  bonkon ,  ispod  bonka bile su damijonice, a na bonku   butilije, a bilo je i žmulih, jerbo je Vinko prodovo vino  i  na žmule  prolaznicima . Pametni mladić sa škoja odma je vidi da slovencima veće  prodo vina na žmule kad napravi bevondu  pok  je  s  vrimenon dolivo i u butilije malo vodie i posol  je  dobro, bome, kuri i za zadrugu  a  i  za Vinkota.  U grodu se pročulo za dobro vino iz Dalmacije  i  u prodajalnu  je dohodilo  sve  veće  judih  s  butilijima  i  tako  je  Vinko   žvielto uči slovenski i steko prijateje,  a dobro je nauči  jazik kad se oženi i  posto slovenski zet iz Dalmacije.

Iako je Vinko  surgo u Sloveniju di mu je bi posol, a kasnije i  fameja, ni zaboravi svuoj škuoj i s famejon bi dohodi liti na more, a onda je prijatejima provjo kako je putovo parvi put deset urih u feroti za Sloveniju i kako je odma  razumi  nike slovenske riči.

„Parvu slovensku rič son ču – provjo je Vinko  -  na MEJI u Dobavi di putnici čekodu dok se promini lokomotiva iz Zagreba i kad mi je ta rič intrala u uho pomisli son na puste meje i mejoše na našemu škoju. Konduktier non je  reko da će u Zidanom mostu bit ZAMUDA. Muški putnici ostali su mirni i  odma son kapi da  konduktier ništa ne priti.  U Zidani muost smo malo zakasnili, ma smo odma nastavili put  iz  parviega  TIRA.

Janez  ni  nojčešće ime u Sloveniji , jerbo bi Slovenci  spominjoli  JURJE  kad su vadili mijore iz takujinih.  I  Slovenci rečedu  GREMO  i  oni  su DOMA , a ne u TUJINI, a  niki  govoridu da imomo,  a niki da nimomo  istu DOMOVINU.

U Sloveniji slušoš VALCERE  i  POLKE  i  u  autobusu ,  oni  volidu popit koju KAPLJICU  DOMAČEGA.  Kad son ču rič  DEŽ  zno son da je tuo naš dorž, Slovenke su DEKLICE, a  na  našemu  škoju  diklice,  KUMARI  su  kukumari. I oni rečedu ko i mi MOTIKA, VINO,  gruožje  je  GROZDJE,  cukar zovedu SLADKOR,  a  mi mirimo  slador  u  mastu   i  tako  daje  –  ča hoće reć da su Dalmatinci  i  Slovenci  imali  dobre  veze i vezice i prin prodajalnih vin i modiernega turizma.

Ma kad son ču da Slovenci rečedu RUMEN zanamisto žut, JABLAN za stablo od jabuke,   LUNA  je   Misec  ča  ga  ne  more  čapat  luna.  GOTOVO  je siguro,  KURIT  ni  hodit  nego  grijot,  KOPAT  je  i   kopat  i  kupat se; ZAHOD  ni  zahod  iliti  kundut  nego  zapad  ecetera – zbaguti  son  se  i pristraši  da  će  mi  se  izmišat  riči.  Od tie nevoje sposila me moja MARICA ča  mi  je  stivala  tako  dobro  sve  slovenske  riči  u  glovi  da Slovenci  mislidu da  več  nison  Vinko,  dalmatinac,  nego  zali  njihov  Janez .„

pofoli se Vinko  prijatejima u svuome mistu na škoju.