Sardele

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

Judi od libra moredu mislit i pisat i ovako i onako, ma jedno je siguro: da ni bilo maslinovega uja, sardiel, ziejo i puliente, mi škojori i Buoduli ne bismo mogli živit i priživit na ovin sikima i brodima od dalekega siedmega vika!

Ovuode moremo spomienit da su naši škojorski prapranuonoti i prapranone bili judi od velikega koraja, jerbo to onda ni bi mačji kašaj ćapat brivu, priskočit konole i skočit na daleke i puste škoje. Ma muola inbando siedmi vik i štoriju, a ćapojmo se naših dondanašnjih sardiel. Mama ni rodila tega Buodula ča ni ji sardele, i to: pečene iz rožnja i gradiel; frigone na uju (sa ili bez mukie oliti brašna); sardele na brujet i lešo (potrušene i nepotrušene), a govori se da jedon Kaštelanin i dondanas ji sirove sardele, bez zarna soli, ča hoće reć da je i prin bilo onih koji su hi jili sirove, bez i s lustrima (znači, nojde se Buodul kojemu sardela , ko i druga riba, ni tri puta plivola: u muoru, uju, vinu ili barienko u bevondi). Mi nismo somo sisoli vesla - imali smo obilato slobodnega vrimena (a ne kako sad somo za vikende i kad si na burzi lavura) pok smo puno tega izumili: nojprin smo svitili lučien, a onda slabijin i jačin ferolima i sad agregatima da bismo skupili po noći jata sardiel, a sad hi lovimo i po donu s dvi koče, pa voga i tira.

A ni potriba puno potiezat mrižu, jerbo ehosonder žvelto pronojde jato sardiel. Srebrene sardele smo solili u darvene barile i barilčiće (nismo žalili suol ko ča nisu ni oni koji su non solili pamet). U konobima su uz bačve vina bili i barili slone ribe i s tin bačvima, karatilima, barilima i barilčićima grodili smo kuće i mola mista po škojima i terafermi.

Nojveće cića sardiel grodili smo lojde i levute, a s velikin brodima izvozili slonu ribu Garcima i Talijoncima. Ma se sve ni moglo prodat friško i slono po smo grodili i fabrike i sve sardele ča bidu dospili u škatulu od late prominili bidu ime i diventale - sardine.

Sardele ča nisu dospile na stol, u barile ili u fabrike išle bi ća po onuoj: muore vos je dolo, neka vos muore i vazme. Ma za reć svu istinu ne more se govorit somo lipo o sardelima; one su, svitu moj, i podilile Bodule na - gospodore (ča su imali brode, mriže i ferole i vazimoli polovicu ribe) i na - družinu ča su imali somo parste i široko, joko pleća koja su mogla podnit noći s veslima i mokrin mrižima.

Ma i meju tuon družinon je bila diferenca oliti rozlika: svićori, paruni, šijovci, barkeri imali su veće dilih i boje misto u brodu nego drug koji je imo dil ili dil i kvarat na čemu je i dondanas osto. Za one ča ćedu pisat štoriju do 50 - 100 godišć potriba je zabiližit da su sva imena u družini ostala ista, somo je drug promini ime - sad se zove - gospodin.