Pusti me proć!

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Sa kaleton piva: Edo Šegvić

zvuci i profumi, kaleta jema sluha

Kaleta nî ni mutava ni gluva. Ona govori, šapje, kašje, piva, viče, ćakula i ruga se. Ona sve sluša, čuje smij mularije koja se igra na vatalo, pridvečer na kukalo. Najslaja in je graja ka’ se vraćaju iz skule, guraju se, lemaju boršan. Žene ćakuladu u ladu na povratku iz spize, pijančina je zaboravija da ne zna pivat. Ovod uvik niko nikoga zove i doziva, ka da judi nimadu mobitel. Svaka klapa jema svoje tajne zvižduke kojiman se dozivadu oli upozoravadu jedan drugega. Nima ovod parlafoni ka u one nove kvartove, pa se još more čut zvižduk prijateja šoto ponistre – amo ća! Samo se tradicjonalni manjinjorgo (manji-njooorgo) sve manje čuje. Kroz ponistru po danu moreš čut i koju grubu rič, znadu se judi dikod i pokarat, a Bože moj, judi smo. Ma sve to ipak začini grdelin svojon nježnon batudon.

Liti noću kroz otvorene škure zaleprša rikamana koltrina i donese zdravo rutavanje poslin dobre večere, posli fažola i pokoji podmukli prdec (neka, manje likaru). Zaškripje koji put i koćeta u jubavnon ginganju. Ma sve je to jopet juski i sa miron.

Pridvečer šoto nikoga volta proleti pisma, to šoto voće piva klapa. Tepli zvuci serenade i mandoline vraćaju sićanja na prošle, naravski, boje dane. Jeste li kad čuli da nika klapa piva meknimo na Treći Split oli na Visoku? To su ambijenti koji nimadu sluha.

Ne triba zaudobit naše stare kampanele i njijova zvona, remeta se uvik poštova, najskoli ako je jema sluha. Kaletan su odzvanjale rezonance zvučnih sinjala koji su bili razgovor crkve i puka. Danas su svi ti zvuci prikriveni pivanjen televižjuna, Severina glason razmiće koltrine. Uši ti zagluši rika motori brez auspuha. Sve se izmiša, zasmrdi benzina, pokrije profume gradel i cvića, udre tufina iz zapušteni' konob, ćuti se umideca.

Liti moderni kontajneri jemadu svoje solističke nastupe, jedino, pari mi se, maškan to ne smeta. Srića da ovod uvik jema rešpira, kalete se prirodno i uredno ventulaju, pa usrid grada ipak mo’š disat punin plućiman.

kaleta (ni)je ulica

More se slobodno reč definicija da je kaleta ulica brez trotoara, jerbo je cila kaleta pločnik.  Kaleta nima zabran prometnic, drž se uzkraj, odaj do korniža, ne smiš ugazit na asfalat, smečit će te. Nima semafori, nima zebri i pješački prelazi. Ovod je nika ka demokracija, moš odat kud te voja, livo, desno, po sridi. Je da ti ne triba vozačka dozvola, ali jopet vaja znat ić našin kaletan. Triba i zato jemat mota, znat elegantno prolazit kroz uske kale pune svita, a ne sudarat se. Ne moreš ić ka sivonja i turat se, gazit svitu po gnjatiman, mavat rukan, svojon boršon razbivat  ženskiman bičve, pjucat oko sebe. Obaturneš li kojega meškinjastega, past će, popust po ovim izglancanin stinaman po podu, more se čovik ubit, ozledit, razbit botilju. Osin tega, uvik jedni gredu polagje, a drugima je priša pa bordižaju i pritiču, gredu livo-desno činidu serpentine. Nike dvi su eno jopet stale i korteđaju veltrine o' butigi, a drugi borami jemaju baš onod na kantun ništo važno za raspravjat.

pusti me proć!

Tisne kale i uski prolazi kod nas dobijedu teplu patinu neminovnosti i prihvaćanja, pa lako nastaje jedinstevni toponim - pusti me proć!  Uski je to i opivani prolaz koji spaja kaletu Kraj Svetega Ivana i Grabovčevu širinu (uz kršćansku Kristonicu svetega Ivana, odnosno rimski Eskulapov, a možda i Jupiterov hram).

ne triba ni govorit koji žongler vaja bit ka’ pa’ne koja kap kiše pa kad krenu lumbrele u đir - legendarna pusti me proć

Ipak, to nije najuži spliski pusti me proć - prolaz! Prođete li Vesanovićevon kalon put Duplančića dvori, jopet će te morat zatvorit lumbrelu. Ovi je prolaz - kolovaja širok samo 63 centimetra, a šta je cilih 6 centimetri manje od onega u Getu, i to na onu donju, užu bandu.

Edo Šegvić, Naš dil Mediterana