PROŠEK

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

Siguro je jedon od dvanaestorice garških bogih na Olimpu imo kruto mieko sarce pok je umučec do ricetu za nektar kojemu smartnemu čoviku da bidu i judi učinili i kušoli pićie ča su onda somo oni pili na višini od 2900 mietor.

Po tuoj riceti Mediteranci su učinili pićie i – da ne bidu najidili boge – nazvoli ga prošekon ča znomo i danas fola butilijima Dalmacijavino na kojima veliškin slovima na bokun starinske korte piše, a povar glovie cara Dioklecijana, „PROŠEK DIOKLECIJAN“ Naši škojori su činili prošek i prin nego su čuli i vidili cukar iz Kube, istina puno manje, ma je tin prošek, pari mi se, nojveće sliči nektaru s Olimpa. Težoci su ga činili od bilega masta di je bilo nojveće bogdanjuše ( somo rič govori da je Buog do to gruožje za dobro vino i dobar prošek).

Za prošek težoci su sušili gruožje i mast bidu kuholi u kotlienke dok ne bidu i bez cukara dobili 29 – 30 grodih sladora. Tako bidu dobili gusti suok ča bi isćaro u karatilčiću ili damijoni i divento bistri rumenokaramelni prošek. Takovo pićie se pilo somo iz bićerinih na tratamientima, za fešte. U bolesti domaćice bi dodoli koji žicu prošeka žbativenemu joju da se bolesnik pokripi i čin pri r ekupero.

Uz zonje pomazanje, ča hoće reć svieto uje, umirućemu bi dovali s vrimena na vrime po malo prošeka da mu bude lašnje (jerboni svak lako, aliegro umiro ko šjor Antonio u Molemu mistu). Užali su i butiliju takega prošeka dobro začepat u godišću kad se rodi sin, a otvorit je kad bi se oženi.

Buoduli su i s bevondon živili puno, a da su pili prošek umisto bevonde i jili kripnu spizu (koju su ondašnji bogi zvoli ambrozija) šuperali bidu i nojstarijega čovika Matuzala. Puku ni poznoto kakovo sva pića pijedu moćnici (ča sad obločidu i viedridu) na tratamientima , iliti kako sad zovemo – na domjencima, ma kad bidu pili necukaroni prošek od bogdanjuše veće i sarčenije bidu se smijali, prin bidu se dogovorili, a , bome, i veće živili.

A škojorskemu puku dobra je i bevonda kad se po užonci nojdemo i zakantomo: “Koliko kapjih toliko lit“