P A N O D A

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

I u ono vrime govorilo se "kruh naš svakdašnji", ča hoće reć da je od kruha bilo potriba svaki don. Ma buduć je u famejima bilo puno justih, a za novo vino u bačvi tukalo je čekot cilo godišće, potriba je bila molit - osobito 2 - 3 miseca prin jematve - manje Boga a veće targuovca da bidu se smilovoli i stavili u dug koju vriću mukie.

Žienske su misile turte u kopanjima i pekle kruh u pećima, ma somo jedonput na šetemonu da bi kruh otvordi i da ga se ča manje ji. Da bidu naložile ogonj na komin mame i none su išle do suside za vaziest žeravu u suhi cimij, jerbo je tukalo zašparenjat furmin, puhale su u žeravu dok se cimij ne razgori, isikle bidu na bokune suhi kruh u vodu, u kojuoj je bilo malo maslinovega uja i soli, i stavili lopižicu u žeravu ili tećicu na trinoge i tako bidu iskuhole panodu, koju je bilo lipje vidit i slaje jist kad bi se u nju izrizola i čarnjeno pomiduora.

Pametnije mame su dovale dici panodu izjutra, jerbo ni bilo obilato kozjega i ovčjega mlika i dica bi slotko izila pjatić teple panodice puno slaje nego ča sad izvicijona dica jidu čokolino, frutolino ili medolino.

Nakon pjata panode bi si sigur da ti se tega dona tarbuh nieće prilipit za škina. A kad je rič o kruhu i panodi, kurijuoža je stvor da imomo puno Tomislava, Mislava, Krunoslava, Vjekoslava i drugih . slava i slavnih, a da još ni jednemu ćaći i ni jednuoj mami ni palo napamet da sinu stavi lipo ime - Kruhoslav.

Ma i u ono vrime bilo je panode ča se ni kuhola na kominu zo se i svoju fameju nego za druge. I tad je bilo /ne/judih ča bidu činili panodu bez lopižic i tećih i tako je bilo panode za vrime izborih, za izbor poteštota, panode s partitima na vlasti, panoda s particelima oliti parcelima, s dohuodkon (ča se dovo gospodorima pojih), s porezon daržavi, panoda sa sansirima i targuovcima, a i drugih većih i manjih privarih i skondalih.

A da ne govorimo obo današnjon panodi ča non je činidu svukuda di pogledoš, a i tuo non još svaki uboga don pokažijedu na televiziji.

I na kraju moremo reć da je panodu i tad bilo i sad dobro jist ma ne i kusat.