Kaleta: Patina prošli’ vrimena

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Kalete se sića: Edo Šegvić

Većina starega graskog tkiva nastala je još u sridnjemu viku. Godinaman su se mista širila, minjala. Minjale su se i države, vladari, običaji, jezici, kultura, način života. Svako je vrime na niki način ostavilotraga iza sebe. Puno je tega pasalo ovin kaletan, nike su stvari zauvik zaboravjene a nike vridi zapametit, ka postreh ili ka opomenu.

U ovin su se kaletan rađala dica, umirali judi, pivale se serenade, pucale rokete, balalo za vrime karnjevala, slavilo svece, gladovalo se i opijalo. Poštiva se drugi; ako je susidima kogod umra, ni bi bija red smijat se i činit  glendu oli zapivat.

Liti posli obida vladala bi tišina, to je vrime o' odmora, vaja ubit oko (počev od Svetega Ante pa do kraja osmega miseca).

Još u ovin stinama zunzi zvuk tondina i mirisa sumpora i klore. Na kantun i sad se vidi taj tondina, na zidu friž o' pokriva važa o’ garbure. Niz onu strminu spuštali su se mulci kareton na balinjere, beštimali oni tankih živac. Teško je danas i zamislit divojke di gredu put funtane donit u maštel vode.

Sredinon devetnajstega vika splisko je područje proizvodilo godišnje oko sto devedeset ijad baril vina oli sto tridese’ ijad tolitri (splisko je barilo jemalo 68,42 litre). Sve je to vajalo smistit po konoban, sve je to prošlo kroz ove kalete.

Kako bi se sunce spušćalo u more, tako bi se iz spliskega poja polako vukli umorni težaci sa natovarenin tovaron u pratnji koze i, naravski, pasa. Ribari bi se spušćali put mandrača do gajet i leuti za poć na ribe, ako Bog da.

Pridvečer su judi užali sidit u kaletaman na prage o' svoji kuć i gledat “kino”. U to vrime ni bilo televižjuna pa je bilo važno ćakulat, komentirat, bit informiran, doznat štagod novega. Pratit ko je proša, a ko nije proša, a koji je ono novi doša, oli se Antici ćer udaje kad nosi onu tortu, vidi šta je Điđi oslabija, bi'će bolestan...

Ona bi sela na mali bančić, za njega bi donila mali kušinić da ne priladi mijur na ledenu stinu praga. Ko je god proša, lipo bi se čuli.

            - Sidite vi, an?

            - E, a evo, pomalo.

Fini gospodin je otiša puzdol, a ozgar se ginga jedna šjora gospoja.

            - Skužajte šjora Keti, tila san vas ništo pitat...

            - Ajme, priša mi je, niman van je sad vrimena, adio, ču'ćemo se...

            - E, znan, sa’se ne denjamo ni javit, digli smo repicu, an. A sićaš  se Ivane ka’ je njezina pokojna mater, Bog jon da pokoj, dolazila ovod, a ni jemala ni postole...

            - Ala, fermaj višje, ne čini mi škandale...

            - A bome, oli ni oni put došla posudit jedno jaje...

            - Kuco, gobo, kad ti govorin...

Ni uvik bilo vrime o' smija i glende. Pante ove kale i svoje rane, ka opomenu vrimena. Eno, jušto na oni kantun, di gredu one dvi švore, trčali su crnokošuljaši. Noć, vrime koprifoga, studen i kiša sa vitron, vanka ni pasa. Bisno su tukle cokule po kamenin pločan, vatale malega Rudija. Srića da se mulac ovod rodija, zna je i u mraku svaku stinu. Ovi in je put pobiga, priskočija zid o' dvora, šmugnija niz kolovaju, priko teze na kupe pa kroz abajin, uvuka se u šufit i pritajija. Dugo je jeza parala noć, ledila krv u žilaman, lutala u tami. Batili su kundaci o vrata susidi, ma niko ni špija. Odrebativale su pritnje o zatvorene škure, gušile se u noći. Kameni se zidi kupili u se,  fumari se bojali disat.

Samo veliki pisnik ka Marin Franičević u Srcu majke more oslikat otu jezu:

Noć uljeza.

Korak krvopije.

Nemili bat u kasni sat.

.....

Udarac na vratima,

podmukli topot hajke.

Ako zastrepi srce,

ono je srce majke.

A di su tek bune puntari, bandire, demonštracjuni, vika protiv kraja i države, uzvišenost procesija na svete dane.

Kaleta je živa povist Splita, koje se ne tribamo sramit. Kaleta je naša prošlost koja živi u sadašnjosti.

Edo Šegvić, Naš dil Mediterana