Ježina

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

Inštituti ča se bavidu muoren istratidu puno piniez i vrimena za vazimot kampijune iz mora da bidu vidili je muore špuorko ili čisto, a mogli bidu tuo lako doznat: dosta je pogledot dno i vidit imo li ili nimo ježin. Ča je muore čistije, u njemu je veće i ježinih i tuo je siguri sinjol čistoće.

Dok nismo znali za deteržiente, purgadure, uje i gorivo za motore, plastiku, gome i drugo smećie morsko dno se čarnilo od ježinih i pistiejih, a u našin valima danas ne moreš vidit ni jednu jedinu ježinu, a ni pistieja. Buodulskoj dici su ježine ostale u gruboj uspomeni, jer ni bilo diteta a da mu se nisu priko lita zabile njezine oštre drače u nogu.

Buol bi bila jačo kad bidu non mame vadile joglima dračice iz plesna - koža je na njima bila već debela kad smo se počeli kupat, jerbo bismo već od Jurjeva pa sve do jematve hodili bosi, a iz debele kože s mukon su non se vadile dračice. Ma i u ježini, kako i u naježenin judima, more se unoć čoguod dobrega.

Tuo dobro je bilo duošlo za nos dicu kad se jedon naš mišćanin vroti iz Amerik i ugrodi onda hotiel ( sad je tuo hotelić), a ispod njega trampulin. Da bi plažicu očisti od ježinih dici je dovo za svaku donesenu ježinu po ondašnju krunu iliti 25 para i tako non je s malo muke bilo lako duoć do dinara s kojim smo mogli kupit malo cukarinih. Ma ta fešta ni puno durala, jerbo je okolo trampulina žvielto nestalo ježin, a za druge ježine ni dovo krune.

Na svitu imo puno teorijih pok imo mista još i za ovu o ježini.

Ona je diventala od skotnega jieža iz vartla ča se iti okupat i kad je zaplivo izliegli su se molisni ježi, a sipa koja se nošla blizu pristrašila se od njih i pustila čarnilo, i tako su su ježići malo po malo obikli na muore i postale čorne ježine - ne zno se točno kad, ma se zno da su one živile na dnu muora i prin siedmega vika.