Hvarske beside - Osmartnica

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

OSMARTNICA

U ove done kad na televiziji čiesto čujemo i vidimo breconje zvona, mužiku funerale, popa kako moli za pokoj obišnega televiziskega sinjola ča je živi 53 godišćo, a umor je, jer ga je zadovi novi digitalni sinjol, Forani i Bročani spomienili su se osmartnice u Pometu ča je najovila smart Jadrolinijine brodske pruge 603 koja je godišćima i godišćima bila pupak ča je vezivo ta dvo škoja sa Spliton („ča je pusta Luondra prema Splitu gradu“ kako se tuo kanto u pismi).

Ko ča isprid tv digitalnega sinjola nestaje obišni sinjol, tako su i Jadrolinijini brodi tipa „Takovo“, „Porozina“, i tako daje, nestali isprid trajektih ča moredu ukarcat ne somo veći bruoj putnika, nego i veliki bruoj autih i kamionih karcatih raznon robon i materijolima.

A kad su čitali tu osmartnicu Forani i Bročani (oliti Bročani i Forani, zavisi iz kojega mista gledote) nisu mogli a da se ne spomienedu i vaporih na garbun ča su zaminili braciere i trabakule i onih pustih dočekih vapuora, gledonja kako kuštoje, stroha da ne pukne cima, daske po kojuoj su se iskarcovali putnici, vinća koji je uz riči vira i majna dizo robu iz stive broda i kalovo je na rivu, fakinih i karih, a posli i traktorih ča su zaminili kare, a nakon njih i modernijih motuornih brodih, ča su bili žveltiji i bez parvie i druge klase kako su bile prin na vapuorima.

Mlaji ča sad putujedu trajektima tipa „Tin Ujević“, „Marjan“ i tako daje, a i katamaranima i gliserima, moredu doznat iz ovie osmartnice ne somo kako su putovoli njihovi stariji, nego i koliko jin je vridila ova brodska veza.

Osmartnica je bila napišena na štokavskom službenon jaziku da je razumidu ne somo škojori:

Rastrgana srca javljamo pretužnu i gorku vijest da je dana 30. IX 1984. nakon duge i teške bolesti ispustila svoju plemenitu dušu Jadrolinijina pruga

               603 SPLIT-SUTIVAN-BOBOVIŠĆE-MILNA-BOL-JELSA-VRBOSKA

Pokojnica je još za vrijeme crno-žute monarhije počela da prevozi putnike i robu na toj relaciji što je nastavila i nakon prvog svjetskog rata neumorno svakog radnog dana te postala pupčana veza i glavni dnevni događaj generacijama malomišćanskog svijeta Brača i Hvara, a zadnjih decenija vikendašima i brojnim turistima.

Posljednji ispraćaj drage nam pokojnice obavljen je uz tužne zvižduke brodske sirene sa broda „Porozina“

Njezin svijetli lik zadržat ćemo u trajnoj uspomeni. Neka joj je vječna slava i hvala!