Hvarske beside - JAGLUN

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

J A G L U N

U ono vrime dici primuorskega molega mista ni bilo potriba od akvarija, jerbo su  u  vali  mogla  gledot i lovit veliki bruoj ribe ča živedu u Jadranskemu muoru.  Ne somo da su dica znala ime svakoj  ribi nego su hi gledoli i u kojoj dubini one živedu, koju ješku voli pojedino vorst ribe, na kolišku udicu tuko nataknit  kus za ujot tu ribu i kakova  je kojo riba za jist. Ma onda još ni bilo najlona nego se lovilo na kuonce i špoge  i ribe nisu nasarćole na jesku.  Puna vala je bila tega morskiega šarenila: u bonaci se vidilo kako glomac viri iz rape, trije kako po dnu koparcodu po fongi, ušate,  cipli i salpušice  plivoli bidu u jatima, ciple je bilo lipo vidit kako jidu ( ne bi se bilo reklo žeredu )  bokun kruha.

Dičjin okon krasno je bilo  gledot kolure kinjezih, dunjačih ,  pirkih,  sonjačih ča ko i špori,  nisu sjatoni.  Sipe i  muzgovci bi duošli i uz kroj i  minjali kolur  prema dnu da hi je težje poznat. Po svilini, ježinima, vlasinicima  se znalo da je muore čisto:  bi je somo purgadur od skule ča je kruto  malo šporkovo mure. U svilini bilo je kuoskih, na njih i na čarviće iz fonge se nojboje lovilo na udicu. Posli daržja zamuti bi se plitki dil vale i tuote bi se lovilo i jaguje.  Kad bidu mišćani proli drobčiće od janjčićih duošle bi bile i komorče, a i jubini su dohodili ne somo kad bi se iskarcovale liti sardele i skuše.

Sva ova riba bila je u vali u svima štajunima  i ona je bila ko domoća za razliku od jaglunićih, polondih,trupih i jaglunih ča se zvola divjo riba i ča bi, obično u jesen, nahrupila u usku valu i već ni znala izoć iz nje pok su  mišćani lako lovili jagluniće saćcima, a i rukamima, trupe mrižicima, a polonde i jaglune ostima i harpunima.  Posli ovakove ribje jematve cilo misto je vonjalo po brujetu, pečenoj i frigonoj ribi.

Tega setiembarskoga dona Stipe je vidi perjanicu ča žvielto siče more i njegovo riborsko oko mu je reklo da je duošo veliki jaglun u valu. U tuo vrime ni bilo puno kaićih  pok su drugi mišćani ćapali i vesla u lojdi , jerbo ujot jagluna ni bila molo stvor i  5 – 6 mišćanih želili su da jin tin jaglun duojde  blizu njihovih ostih. Jure je parvi ubo jagluna ma mu  osti nisu ostale u jaglunovo mieko mieso. Kuzmi se slomilo kopišće , a osti zabole u ranjenu ribu. Tuoni je slušo viku i išo  na žolo da gledo tin napieti  luov.  I ovuon je imo nojveće sriće: izbezumjena riba od boli  uputila se dreto na žolo di je bi Tuoni i ta vretenasto ribetina tieška oko 20 kil počela je štrucot u njegove joke ruke.

Bila je tuo bravura Tuonetu ćapat tolišku modro-srebarnastu ribu golin rukima i nosit je doma . Glos o ulovjenom jaglunu prosu se po mistu i mišćani su dohodili vidit  jagluna ča je visi na gonču ispod vuolta Tuonetove konobe.

Ma onda još ni vridila ona „ ko je ujo, ujo je“  pok je Tuoni nojprin vroti Kuzmi osti, a  debje fete nego susidi , rodbina i svuojta dobi je i Stipe , Jure i  Kuzma . Onda  ni  bilo  frižidierih  pok je u muškadurima  mogla  ostat  friško  riba  somo za kojin don. Iz kominih tega dona i sutra po cilom  mistu širi se vuonj pečenega jagluna na gradikule.