Hvarske beside - IVE KANTADUR

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

U ono vrime su mišćani molega mista na škoju slušoli misu na latinskemu, kantaduri kantali, dica u koti odgovorali šer kurotu latinski, a da ni mišćani, ni kantaduri, ni dica nisu kapili latinski ni pinke ča hi je šer kurot nauči za reć misu. Ive je uvik kanto s još dvo kantadura s desne bonde ispod oltora, a u livemu bonku bila su još trojica kantadurih ča bidu uz uorgan zajedno kantali ili jedni nakon drugih, ča je zavisilo od funkcijuna.

Svih šiest kantadurih bili su judi srinje dobi. Ive je još imo dobru vištu i njemu ni bilo potriba da natakne oćole na nos, kako se onda nosilo oćole. Onda se ni moglo zamislit da žienske duojdedu u crikvu krotkih rukovih ili da jin glova ni pokrivena (starijin nonima čornon mahramon, a mlajim ženima čornin vielon) i one su bile u bonkima odvojene od muških. Apunto, bilo je jedno misto na misi ča su mišćani i kantaduri, kad su imali kantat „homo factus est“ (ča hoće reć da je posto čovikon), malo iskrivili i pivoli „ homo factu sest“ , a onda su tuo svi lipo razumili po našu „homo sest“ i onda bidu svi seli, ča je bilo komodnije nego stot ili kliečat.

Ma vrotmo se Ivetu: u crikvu je uvik bi obučien u jedon jedini veštit ča ga je nabavi kad se oženi. Istico se od drugih kantadurih po temu ča bi u riči Amen otiego zonji glos n. Ive se oženi kad je već bi blizu četardesiete , imo je somo dvo sina, za razliku od drugih oženjenih ča su imali i veće od petero dicie, Ma i tako molo Ivetova fameja tieško je živila: nisu imali puno pojih i maslinih pok je Ive nabavi dvi vorše i u njima bi lovi ciple, špore, salpušice i drugu manjuš za njihovu potribu.

Bila je radost za fameju kad bi doni ugora, jubina ili većega cipla. Ko i druge i Iveta su od ditistva učili da se more pokrit bijcon koliko je velik i da vajo šparenjat. Petrolij, cukar, furmini su tad bili skupi , bili su deržavni monopol i Ivetovima bi navečer čiesto gorila svićica od uja misto svićie od petrolija. Dici se govorilo da je grih ukrast kus cukara, a za zašparenjat furmin Ivetova žena Kuzmona bi išla u siside važiest žeravu iz komina u suhi cimij i doma bi puhala u žeravu dok se ne užeže cimij i razgori ogonj.

Prola je pjate gominjačon , misila i pekla kruh jedonput na šetemonu, jerbo se kruh kad otvordne ji manje nego friški. Plela je, karpila i gojila kozu, a lancuni su jon posli lušije vonjali lipje nego sad kad su oproni deteržienton. Ive bi liti išo po sikima i iz lokvic vazimo muore na kojega se ćapala već slono kora i tuo suši na taraci da bi dobi suol.

Dica su hodila bosa cilo lito, jerbo su postoli bili skupi, a u pušku skulu su išla somo s lopišon i tablicon po kojuoj se moglo pisat i brisat po voji kako danas u kompjutoru. Soma dica bi napravila igraške (vartila, ščikandure , mišiće i tapice, brodiće i balunčiče), a znali su puno igor, a i bila su od koristi u jematvi, brali gruožje, pomogali turnat u konobi i kupit masline. Kad je bilo potriba po valima su privarćoli stinje da bidu skupili ugarcih, luporih, voljokih i kunkih , ča se zovedu „uho svietega Petra.“

I tako je Ivetova fameja živila sve dok ni nestalo Krajevine Jugoslavije , kad su duošli taljonski soldati. U tuo ratno vrime sve težje je bilo Ivetovima, ko i drugima na škoju, parićovat obide i večere. Duošlo je i do tega da se govorilo da tuko dat „žuto za žuto“, ča se tad itilo reć da vajo dat suho zloto za žuti kukuruz olitiga frementun ča ga se mlilo u žorna.

Prin nego su se taljonski vojnici vrotili doma , Ive se razboli i umor, a fameja mu je malo nakon njegove smarti išla s drugima iz Dalmacije u zbjeg na Suez u izbjegliški logor El Shatt, proživila rat i vrotila se doma na škuoj.

Fotografije: Edo Šegvić