Hrebčić u lopiži

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Za e-ćakule sa lipoga Hvara: Insulano

U vrime kad su ribori imali vesla i jidra riborskim družinima, ča su lovili
sardele, ni bilo lako  vozit iz dalekih poštih doma u porat  pok bidu
ostali po nikoliko don po riborskim poštima.
Zapuhala  joko litnjo bura  i  družina   Zaneta  Kuparića  duošla  na poštu
Dubac, surgali  i  iskarcali  ribu.  Sutradon  bila  nedija  i  svićor
Mikula  i  parun  Tuoni  odlučili puoć  u don Tadeta  ča  je  bi  kurot  u
selu  da  bidu  se dobro  najili , a  još  boje  i  napili.
 Duošli  oni  prid  kurotovu  kuću  s  ugoron  u  spartici,  a  don  Tade
hroni kokoše.
     - Dobro jutro šjor kurote!

     -Dobro jutro!  O,  za  milega  Boga, Mikula,  di  si  mi, nison  te
vidi već puno  vrimena!  Hodte  naprid!

Kad su se malo porazgovorili,  don Tade  je  reko  svojuoj  domaćici  Marici
da  jin stavi  na  stuol  turtu  kruha,  peču  sira  i  butuljun  vina  i
da  hi  pusti na  miru  da  jidu  i  pijedu,  a  posli  da  ostavidu  kjuč
od  kuće  u  rapu, jerbo  njima  vajo  puoć  u  crikvu  na  misu.
Ma  Mikuli  i  Tuonetu  zavonjalo  mieso  ča  se  kuholo  u  lopiži  i
Mikula će Tuonetu:
-       Puoj  u  dvuor,  nojdi  hrepčić,  a  mi  ćemo  izist  i  ovo  miesa
i  stavit hrepčić u lopižu.

Tuoni je u dvuoru izabro pizienti hrepčić da boje potone i nakon ča su se
dobro  najili  i  napili,  tumbali  hrepčić  u  juhu  i  stavili  kjuč  od
kuće u rapu  di  jin  je  pokozala  Marica.
Marici  se pod  perunuon  učinilo  da  mieso  još  ni  dobro  kuhono  pok
ni zvola  don Tadeta  na  obid.  Ma  don  Tade   oglodni  pa  će  Marici:
-       Ča  je,  Mare,  je se tuo mieso već iskuholo ?
-       Još  je  tvordo!  reče  Marica  i  naloži  boje.
Ma don Tadetu dodijolo čekot, vaze  perun  i  kad  je  vidi  hrebčić  ni
mogo  za  hip  duoć  sebi,  a  kad  se  razabro , onda  je  išo  po  lovašku
pušku  i pokozo je Marici.
-       Ova  će, viruj  mi, sudit  onin  farizejima  i  lupežima  kad
duojdedu!
Sutradon  još  žešćo  bura,  a  Mikula  govori  Tuonetu  da  epeta  griedu
u selo.
-       Jo ti tamo  nieću.  Požor  si  mu  mieso  i  još  narugo  š  njin!
-       Ne buoj se ,Tuoni, ništa!  Somo  se  nemuoj  nasmijat  kad  duojdemo
kod  kurota!   I guluozi ,  a  još  veće  žiedni  Tuoni  pristo  da  epeta
idedu  na  kojin  dobri  bokun.
Kad je don Tade vidi  da  mu  Mikula i Tuoni  griedu  prema kući,  izošo je
na sulor  i  upieri  pušku  na  Mikota.
-       Mikula,  ova  ćete  sad  odvest  u  krajiestvo  nebesko!
Na  te  riči  Mikula  klekni,  zlameno  se,   izvadi  krunicu  iz  žepa,  a
Tuoni stoji  do  njega  u  strohu  ko  ćuk.
-       Ča  je, za milega  Isukarsta,  don  Tade,  ča  von  se  dogodilo.
mi  smo veliki  prijateji!
-       Ma  ča  si  mi  jučier  Mikula  opravi!   Izili ste  mi  mieso  i
još stavili hrebčić  u  juhu!
-       Ča  von  dohodi  napamet,  šjor  kurote?  Kako  morete  posumnjat  u
svoje  prijateje.
Na  te  se   Mikuline  riči don  Tade  inkanto  i  pomisli  da  su  mu  tuo
učinili  susidi  ča  znodu  u  koju  rapu  Marica   ostavi   kjuč  od  kuće
i  don Tade  epeta  lipo  primi  Mikota  i  Tuoneta.  a  kad  su  izošli  iz
kurotove kuće,  siti,   Mikula  će  Tuonetu:
-       Jes  vidi  kako  son  ga  žiednega  prive  priko  vodie,  ti  mu  ga
ne  biš ovako!