ĆELA

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

Piše: Insulano

Ritko, kruto ritko oćelavidu buodulski težoci i ribori i oni ča rabotodu na čistoj ariji, jerbo oni vitridu glove.

Vlos po vlos, godišće po godišče impjegotima ča sididu po kancelarijima i ne vididu puno svitlosti božje sve jače svitlidu ćele i sve veće sličidu na sviece kojima je nacrtan svitli krug okolo glovie.

Buoduli stimodu ćelave, jerbo ćelavci daržidu pera u ruke (a sad duperodu i kompjutore) i vrotidu se doma čisti, a težoci i ribori duojdedu doma šporki i sada kad imodu i motore, a ne somo motiku i vesla .

Reče se da ćelavima izrieste i kojo dlaka na jaziku, ča hoće reć da oni ne govoridu sve ča jin pade na pameti, ne rečedu dreto šćeto ča imodu voju, jerbo miridu riči i zatuo su i pametni. Ćelavi i oni ča nosidu folse vlose moredu se nagledot i naslušot svakih skondalih i batibujih na televiziji, a njima se ne more vidit najiežene vlose.

Ove batudice o ćeli ne biste mogli čitat i slušot da ni bilo oglasih Elektrodalmacije priko kojih su napovidali svitu da će jin nestat svitlosti po kućima ako ne namiridu njihove račune za struju i još su žuntali da će non somo ćele svitlit!

Po temu se vidi da su te oglase po novinima i na radiju pisali letričari žutokjunci, jerbo oni ne znodu da smo prin (a i sad po nikin selima i kućima) koristili i koristimo svitlost od uognja na kominu, od šterike, od svićice na uje i sviće na petrolij, a kojin ćelavac bi koristi ćelu dok ne duojde do furmina.

I na zonju iliti kunju: ako dobijete kojin popapreni račun Hrvatske elektroprivrede, nemujte odma zaželit da von svitli svitlost vikovišnja!